الأنطولوجيا العامية 2018

مُختارات شيندالية لما استأهل 7 من عشرة فما فوق على مقياس شيندال للإرتداد الوجداني من القصائد العامية على أنواعها..




... و يحظر التعليق هنا.

الصبر جميل




شيندال




قالوا جميل الصبر و عيونو كحيلة
بس طعمو مُرْ
أمال إيه لِ يشفي ألف نيلة و نيلة
غير الدوا اللي يضر !
تكويك أسية بنار ليها سنين طويلة
و تلوي راسك لَيْ
و دواك عصير الصبر تشرب منو كيلة
أو دواك الكي

سأل الطبيب قام قال ما باليد حيلة
سأل المجرب صاب
وصف العلاج بالصبر للروح العليلة
و الزمن قلاب
يبرم و تتبدل ليالينا في ليلة
و الفرج لوه باب

يبقى إيه معنى الوطن



شعر محمد أبو يوسف




كلمة وطن يعنى الحياه
كلمة وطن يعنى الخلود
كلمة وطن
معناها روح بتميل لروح
معناها عمرى مانْكِسِر
مهما يهز القلب ريح
معناها دينى جوا قلبى
منين مارُوْحْ
كلمة وطن يعنى سلام
يعنى كلمة ف حضن كلمه
يعنى لَمَّه جوا لمه
يعنى حاره يعنى شارع
قلبنا ف الحب بارع
يعنى معناه انسجام
كلمة وطن
يعنى جيل يبنى جيل
يعنى زرعه يعنى نيل
يعنى قمره يعنى ليل
فيه بيحْلَوْ الكلام
كلمة وطن
يعنى روح جوا النفوس
يعنى إيْد طايله الشموس
يعنى دين ويعنى رب
لو تِدَوَّر عن حبيب
تِلْقَى جنبك ميت أنيس
كلمة وطن
يعنى الأمل
يعنى ليه أبقى تعيس

الصعيد


شعر عبد الرحمن الفارس









قم يامصري قل لي أصلــك أصلـــــــي طبعا في الصعيد

والصعيدي في مصر دايما رأيه أقــــــــوى من الحديد

مــــــن يـــــنـكت من يقول أصــــــــــله كاره أو عزول

إوعـــى تغـلـط يا ابن بلـدي فــــــي الصعايده والأصول

كـــل واحـــــــد شـــد حيله راح عامـــــلـي شريط جديد

بالنـــكات الــخايبه يضحك وانـــــــت إيه جنب الصعيد!

مــــن كـتـبـلـك عـبـقـريــه مـــــــن هــــداك أكبر هديه

دي الــــثـــقافه والحضاره فــــــــي إسم عقاد الصعيد

عبـــــــــــرات المنفلوطـي نظـــــــــــرات هــذا الأديب

اقرا يا ابني بلاش مكابـره فـــــــــي الأشاوس لاتعيب

عندك الأبـــــــنودي عمده للــــــــــــزجل عبر السنين

آه للـــــــــمـــــــــوال مـنه هـــــــــــــز جس المطربين

قائـــــــــد الثوره المجيده أصلـــــــه مـن قلب الصعيد

ناصـر الأسيوطي يا إبنـي صاحــــــــــب الرأي الفريد

إوعى تنسى يا ابني طـــه لـــــــــــــلأدب دايما عميد

خلي بالك طه يا ابـــــــني أصــــله برضه من الصعيد

حتى نهر النيــــــل بتاعنا أصلـــــــه جاي من الصعيد

حتى آثار الفراعــــــــــنه

كم ها أقولك كم ها أعيدلك

أنت أصلك يا ابني جاهل بالصعيد

السنين عدت خلاص


شعر أحمد ابراهيم أحمد








السؤال المر عدا وانحنت لينا السنين
والبياض ف الشعر عشش والحياة دامت لمين؟
وانتى جاية بتسألينى:
هو ليه قتلك شعورك؟
دايرة فيها المحرومين....
المشاعر ياحبيتى كلها راحت عليها
والاحبة من بعيد لبعيد يعيشوا
والحبيبة اللى عارفها
كدبها لايق عليها
زى توبها
من بعيد لبعيد يزغلل ف العيون
أما من جوة فرااااااااااغ
دنيا تقتل كل شاعر
واللى فاز فيها الجنون
لسة برضو بتسألينى:
حتى اشعارك حزاينى ؟
مرة تنشد للطيور
والبحور الساكنة تنظق
والحروف الناطقة دايما
تختفى ف دفتر حضور
السؤال مر بمرارة عمرى كله
وقت ماقدرتش أحبك
الضلام عشش وبات
والسفر عنوان يقول له
السنين عدت خلاص

القطر جالو المعاد




شعر محمد الصاوي



يا أبو قلب عاش ف البلاد
شمالها ويمينها
من قلبك إنت وبس النظره تكفيني
القطر جاله الميعاد
ولا حد نبهنا
ف طريقي ماشى السكك
لو عِدله تكفيني
يا أبو قلب عاش ف الحياة للغرقانين مينا
لا بحر عاد ولا نيل لعطشنا يروينا
انا قلبي صابه العطب
والطب دلونى
وإنت العلاج والدوا ودنيتي إنت
داخل معاك تربتك ودموعى تسبقني
داخل معاك جنتك وورايا تلحقني
بانى الحيطان والسما طوبه ورا طوبه
ليك الف روح ف السما وحوريه مخطوبه
يحزن عليك التراب وإنت ف أحضانه
تحزن عليك البيوت ليله ورا ليله
ولا عدتش فيه ف الربيع هيصه وهوليله
ولا عدتش لعب العيال ما بين دراعينك
ولا عدت رمى الهموم انساه على بابك
ولا فيش سبيل للدخول ولا اعدي أعتابك
ولا فيه نهار راح يعود ولا اشوفه من تانى
طب مين ف يوم هشكيه أيامي ومرارها
بشويش يا قبر عليه
جواك نهار نايم
للجنه شد الرحال
وبرؤيته هايم
نامت عينيك م الشقا
مقفول عليك بابك
راجع ف إيد صحبتك وعليك تعزيني
ويقولوا طول الاجل لعمرى ف غيابك
تنسانى خبطه إيديا والدق ع الابواب
وكلمة توهه ما شرف قوموا أفتحولوا الباب
وإزاى هتقدر تنام من غير ما اخش البيت
وإزاى هتحرم شفايفي من حضنها لإيديك
قعدت كلام العشا وعنيك تعلمنى
يا أول اللى عشقت وأول الاحباب
وقت الوداع إنتهى والمسح ع الابواب
القطر لما نداك نازل وبتلبي
ولا عدتش صوت ف لقاك
غير دعوه من ربي
إنى ف يوم القاك حضنك يدفيني
وأجمع حصاد غربتك بإيديك وتسقيني

سنة جديدة :-
========




شعر علي مصطفى إبراهيم




( ومستنى سنة جديدة )
أغير فيها احساسي
و صحَّح خطو أقداري
و طفّي م الهوى ناري
و عدِّل سيري من تاني
ما بين راسي ..
وبين ساسىي..

ولملم فيها أشلائي
وحبي إللي كان باقي
والم العيلة زى زمان
ونحكى حكاوي جدتنا
وكان يا ما كان ...

وأرجع فرحة اللمة
وود الجيرة والأصحاب
وأزور الخالة والعمة
ونفرح بالحصاد تاني
ويوم السعد يوم ضمة
ونتجمع في وسط الدار
ونعلب تاني شخليلة
وتجمعنا بها العيلة
وأحب جارتنا سعدية
وم النسمة عليها أغار
و خبّي فرحتي ف قلبي
وأفرش سعدي في الدوار
وتِمْلا الدنيا ضحكتها
هنا و عمار
.
ونفسي كمان
أحقق كل أحلامي
وتسعد فيها أيامي
وترحل عنى آلامي
وأشوف الفرح حوالية
ما فيش إرهاب .. ولا تفجير ..
ولا مراقب حياتي خفير ..
و صحِّي في النفوس ضابط
كان أسمه ضمير
عمره ف يوم ما كان يعرف
غنى وفقير ..

و نعمل زفة فلاحي
أنا والبت سعدية
و نشرب من دفا العيلة
و لمة غدوة تجمعنا بطبلية
و أزور الغيط
و أملى عنيّا بالخضرة
وأصلى على النبي المختار
وذكره يسعد الحضرة
مدد يا ست يا طاهرة
.
ونفسي كمان ..
أسابق ع الشطوط الموج
وأشرب م القنا تانى
و خضّر أرض أجدادي
اللي عانت من جفاف النيل
ولسه ياما هتعاني
و رجّع ذكرى عجباني
صباح ... وفريد
حليم ... وأكيد
ثومه ... ووردة.. من تاني

وأنسى الطشت لو قلي
بحبك مرة يوم يا حمار ..
ما أنا عن أصلي لازم أغار
وأنسى الشبشب أبو صباع ..
وعندي ظروف ..
ما أنا على ولدى متحيّر
قتلني الخوف
صحيح الدنيا دوارة
و نا نفسي السنة دية
تلف وترجع الحارة
و لاقى الحب زى زمان
ما أقولش في مرة يا خسارة
ما أقولش في مرة يا خسارة
.

مصر فوق المحن
...
شعر : د. جمال مرسي
...
( ميم ) ( صاد ) و ( ره )
دا رسمها
من يوم ما ربك حطها
فوق الخريطة
و خطها
في كتاب ملان بالمعجزات .
( ميم ) ( صاد) و ( ره )
دا إسمها
بتردده الناس كلها
و بتكتبه بكل اللغات .
و لا يوم تغير جلدها
أو طبعها
أو دمها
من يوم ما ربك قال لها :
كوني
فكانت جنته
من خلق آدم للممات .
و لا عمر يوم حتهزها ريح أو تكسر عضمها
او عزمها
أو حتى يضعف شعبها
بالتفجيرات.
فاتأكدوا و اتأكدوا
يا شلة الإرهابْ بأن الغدر خابْ
و ما لوش مكان
حتى و لو طال الزمان
و رفعتوا بالباطل رايات .
و اتأكدوا
يا نسل إبليس اللعين
لو مُتنا في الجامع ألوف
حنموت و لا نذل الأنوف
إلا لرب العالمينْ .
روح الشهيد في الجنة طيرْ أخضر يطوف
أـما انتو يا شوية كلاب
ما لهومش دينْ .
فبإذن رب العالمين
رايحين على جهنم صفوف .
ـــــ

يا ريس البحر

شعر أحمد ابراهيم




يا




ياريس البحر خطي الموج وماتعافر
ازاي اسافر وانا اللي الحظ علمني
ياريس البحر هاتلي حروفي شيلهالي
من صوت رصاصة عدوي
حان الوجت سابهالي
تارك دياري لكين برضك ماعلمني!!


ياريس البحر
خانى الموج ومش عارف
لفين الرحلة وخدانى وبعافر
ف قلب الموت بقالي سنين


ياريس البحر
بلاش للبحر ترميني
انا العاشق تراب وطنى
ياريتك ليه توديني
وتطلق ف الفضا جناحى



ياريس البحر من وزك تفارقنى
وانت اللى كنت السند دايما تشاركنى
ياريس البحر شاور وانت بتعدى
دى دار عمامى ودار الجد عارفها
ودى نخلة شاهدة عارفانى وعارفها