آخر 10 مشاركات
اللحظة الفاصلة (الكاتـب : - مشاركات : 0 - المشاهدات : 1 - الوقت: 08:46 AM - التاريخ: 08-15-2018)           »          الرباعيات 10 (الكاتـب : - آخر مشاركة : - مشاركات : 3 - المشاهدات : 11 - الوقت: 02:56 AM - التاريخ: 08-15-2018)           »          جدارٌ منهك (الكاتـب : - آخر مشاركة : - مشاركات : 12 - المشاهدات : 190 - الوقت: 12:20 AM - التاريخ: 08-15-2018)           »          استقبال/ق ق ج (الكاتـب : - مشاركات : 12 - المشاهدات : 263 - الوقت: 12:15 AM - التاريخ: 08-15-2018)           »          سرقة رواية "حورس".. سابقة غريبة تُنبئ بالأسوأ (الكاتـب : - آخر مشاركة : - مشاركات : 3 - المشاهدات : 40 - الوقت: 11:51 PM - التاريخ: 08-14-2018)           »          عفواً "كنوت هامسون" (الكاتـب : - آخر مشاركة : - مشاركات : 6 - المشاهدات : 366 - الوقت: 10:08 PM - التاريخ: 08-14-2018)           »          :~* هل ،،، تسمعني ؟! :~* (الكاتـب : - آخر مشاركة : - مشاركات : 1054 - المشاهدات : 34444 - الوقت: 08:44 PM - التاريخ: 08-14-2018)           »          بَحرُ العرب (الكاتـب : - آخر مشاركة : - مشاركات : 11 - المشاهدات : 464 - الوقت: 07:37 PM - التاريخ: 08-14-2018)           »          بيان رئاسي !!! (الكاتـب : - مشاركات : 0 - المشاهدات : 32 - الوقت: 07:33 PM - التاريخ: 08-14-2018)           »          على ضي القناديل (الكاتـب : - مشاركات : 215 - المشاهدات : 5644 - الوقت: 04:03 PM - التاريخ: 08-14-2018)




ديوان (روحى بيسكنها الحمام) ل منصوررجب

دواوين شعراء العامية


إضافة رد
قديم 01-12-2012, 03:48 PM رقم المشاركة : 1
معلومات العضو
شاعر

الصورة الرمزية منصوررجب
إحصائية العضو






منصوررجب is on a distinguished road

منصوررجب غير متواجد حالياً

 


المنتدى : دواوين شعراء العامية
افتراضي ديوان (روحى بيسكنها الحمام) ل منصوررجب

(استعذاب )

ويا اللى عنيكى سبورة
أنا التلميذ
أنا الدايب .. أنا خايب
عنيد وبليد
بليد بعدك
آيا اللى البعد مسطرتك
بمسطرتك
بيتلسوع جبين قلبى
يا قلب حديد
يا فصل جديد وأنا لوحدى اللى طاير
فيكى باتعذب
وبافرد وشك الكراس
باتهجى وباتذنب
وباستعذب
عذابك فيا .. والأعذب
عنيكى ورخية الحراس
ويا اللى عنيكى سبورة
كتبتك
جوه قلبى الماس اسطوره
وأسطرتك
وبارجعْ تانى أتلسوع
بمسطرتك
ويا اللى ف دفاترى حضور
بابص ألاقى نفسى غياب
فى دفاترك

(حـــزن )

وشك .. عيال
حسك ملايكه وزقزقة عصافير
لعبك ..
عرايس بيضا بالطباشير
فوق الحيطان
لعبى الغيطان .. وجنينه ف الشنطه
قلبى يا شجر التين
يا طارح الشطه
وانت اللى لسه يا دوب
بتعرف تلعب النطه
زى العيال
ويا العيال الغلة فى المراجيح
زى العيال فى حرب طليا
وهما بيحدفوا السواريخ
فى مربع الأولى
على أمنا الغوله
اللى بنداكى يا وردة .. بتكفن التواريخ
ميهمهاش
النخل لو ينحنى
ميهمهاس
الحزن لو ينتنى فى قلوبنا كالخطاطيف
عليكى يا وردة
ومفكرة الهبلة .. لما تحشك
بمنجل الكام دور
راح توصل المريخ


(ما بين الخص والبرسيم )


ما بين سبابتى والإبهام
وبين حسى
وتحت التوتة .. ع الساقية
أنا دايما باسيب نفسى
مع حصان الخيال
باجمح
ما بين الخص والبرسيم
وبحصانى الخطب بارمح
على السكة
باهدد للعيال فى بيوت
بنوها بطين
والخبط للعيال كام غيط
فى حضن الكوم
وباقبض ع الحرامية
ما أنا العسكر
محدش م العيال يقدر يغالبنى
وبحصانى الحطب بارمح
ولا واحد فى يوم جابنى
ما أنا عنتر
معاكى أكيد باكون أهدى من النمسة
ووياهم باكون فرعون
أنا المفتون
عريسك بس فى اللعبة
وف الواقع .. أنا مهزوم
قنايا دموعى فى عنيا
فهاتى اديكى فى إيديا
تكون لعنيا .. غيط برسيم


(روحى بيسكنها الحمام )


وحمام فى روحى بينطلق ليها
واحلم إيديها توسع المسافات
وتفك عن روحى
واحلم لروحى بجناحات
واحلم بعينى سما
والسما عينى ..
بتواصل البصات
على بنت واقفه قلبها
يوسع سبع غيات
هج الحمام منى
عشش على سدرها
بلت له ريقه بريق
احلى من التمرات
فضلت تغنى له
وسابتنى واقف
وواقفه الشمس فى حلقى
وسابتنى واقف
وريقى انشف من الحطابات
وحمام فى روحى بينطلق ليها
واحلم ايديها توسع المسافات
وتفك عن روحى




(نظـــــــره )


يابنت
شقشق شفق من شفشق الشربات
لما شفايفك شفت اللولي
قلبي النجف ... مطفي / ورا الشباك
واقفه تشاوري لي
وانا اللى مجذوب ف انتظار نظره
زي الغسيل ما يطير من على حبال الغسيل
روحي راحت منى
أنا رحت نازل ساحات الذِكر والإنشاد
وبقيت أنا المنشد
ووقفت أقول
وشك حليب
روحي بقت جمرة
قلبي الحرير إنكوى .. بعيونك الخمرة
منين أجيب الدوا لعيوني الحمرا
وانتي عنيكي السم والترياق
لما بأقول لك تعالى نوصل المقطوع
طفح الجزر ع الوش
سبت الغسيل .. اندلق منك
أنا رحت زاحف على ركبي في وسط القش
لما نقرني الديك
كريت على السلم



(نقطه سودا ف البياض)


البنت
إياها اللي بتعمل مشاعرها
ضفاير
وبتفرش نيتها / ملايتها البيضا
ستاير
ظبطوها بتحلم مع عيل عريانه فـ حلم حليب

البنت
لما الحقيقة دلدلدت رجليها على شط الحياة الملح
عام شعرها ع الميه
وانكشف سدرها الخمران وطايب للخبيز
طرطش لبن في عين أبوها
فتحت وردة تحت الصُرة
بلع أبوها الحقيقة
قام شبك فـ السن

فرفرت مناديل إيديها
فرهض الحلم الحمامة في قفص سدر البنيه
نط منها
تحت شباك التذاكر
شال على رأسه التراب وسف
وأما شف اللون لدرجه لاسوداد
نط بيها
تحت قضبان العجل تتزف
........
قولوا لأبوها اسكت بقى واتمسى
قولوا لأبوها الدم ابيض بفته



(أنا اللي طول عمري ما جاتني الحمى ولا خرفت)



قالت:
كل دروس المنهج وشك
قلت: كلام !؟
لما الجرسون حط المانجة
قلت أهو أنتي .. وأحلى كمان
قعدت تضحك
....
يا سريري المتململ منى
ياهدومي الزهقانة ويااه
يا الحقنة اللي بتشرب دمي
بتنزلني بحور الآه
يا حضور البنت اللي مهفهف
بيوصلني لشط حياه
قلت لابويا أكمل ديني
قام موتني بقولة .. لا
...............
وكإن (إيهاب) متقصدني
كل ما باهرب من نفسي معاكي
يطاردني
في الشارع
في المترو
في العربيات الأجرة
حتى معاكي في الكازينو .. برضه ما بيسبني !!!
الله يكون في عونك
-شابفه
عّمال يتعلق في رقبتي
عّمال بيقطع شراييني
ولما بيوصل
يااللي دموع قلبك .. مبتوصلش لعيونك
بتفر الدمعة في عيني
.....
نفس المشهد
قاعد بتقلب فـ الموضوع
تطلع من عقدة ...تظهر قدامك مليون عقدة
فتمد إيديها
بعدما تتأكد أن مفيش ع البعد رجوع
تمسك إيدها
أوعدني بإن نكون أصحاب
فتقول موجوع
............
وفي غمرة ودك ليها
بتسقط إيدك من إيديها
فتقوم مفزوع


(بـافكر فيكي .. شعري شاط )


أنا شايل في قلبي ليكي كام ذكري
في كام منديل
وكام بوسه في بير السلم العتمه
وكوم أحضان
وكام ضحكة
وكام دمعة
وكام شمعة في ضلام الليل
وأنا لوحدي
وأنا قاعد بافكّر فيكي وفـ وردة
ريحتها لسه مرحتشى
بافوق على لسعة الشمعة
وكام دمعة على خدى
وطعم شياط


(مش بأرفضك )


مش معنى إن أبويا قال
فيكى كلام
وأنا قلت لك نفس الكلام
يبقى خلاص أنا بأرفضك
أعوذ بالله م الشرك بيه
ومن عبادة حد غيرة
يا حبيبتى أنا باعبدك
تشهد عليه
غية حمامى المغربية
وحر يونية
والليل
وتليفون العمل
تشهد عليه
(أميره ) و (حنين ) و( أعتراف ) •
ساعة حبيبتى ما قلت لك
أنى بحبك
كات أول مره اعترف
فيه ناس بتاخد كلمتى دى يا حبيبتى
احتراف
لكن أنا
صادق مسافر للعفاف
يشهد عليه ربنا
لما إيديا رفعتها ليه بالدعاء
وف سرى كنت بسألهُ
يجمع ما بينا
لكن حبيبتى أتقّفلت
كل البيبان
وأتبرمجت
دماغ أبويا بالعادات
وأتمد بينا سور حديد
أنا يا حبيبتى بأعتذرلك
مش ناوى اهرب
ولا حانتحر
ولا حافضل بعيد
ولاحانتظر
يهزمنى روماتيزم المفاصل
وحركتى تبقى زى مشية سلحفاه
لكن حبيبتى
حاحط رجلى ع الطريق
وحاجيكى ومعايا
حلمى البرئ
فجرى الجديد
طوق النجاه




(تــلقائيــــــة )


حتلوميني ؟
لومي فيا . بس مش ممكن في يوم
راح تكسريني
لو عرفتي فـ قلبي ليكي قد أيه
حب وحنين
مش في يوم راح تكرهيني
لو كرهتي . اكرهيني
بس مش ممكن في يوم راح تخسريني
لو تلومي .. لومي فيا
قلبي حب بتلقائية
بس ياعيني عليه
بتحِزّ فيه
كتر القسية





(من غـير نـفس )



حبست نفسي في أوضه ضلمه
وسبتها وطلعت
دخلت بسرعة فـى هدومي
قفلت الشقة بالمفتاح
ورحت الشغل
قابلني القائد "المُنعم" بوش خشب
اداني كلمتين فـ جنابي
خدتهم وسكت
قالت لي البت من ضيقها
خلاص مبقتش من توبي
سبتها ومشيت
ولما رجعت
فتحت الأوضة على نفسي
وقدت النور
لقيتها قاعدة بتعيط
خدتها فـ حضني .. ونمت


(بورتريه)


( عبد الرازق )
واد ولا كل ولاد الحته
اسم الله عليه
هادى وراسى
اهدى من النسمه
وطيب خالص
فاتح قلبه وبابه الخلفى
لكل غتات عيال الشارع
جسمه الفارع
عمره ما حطه كآ لة بطس
علشان قادر
كان بيسامح
علشان قلبه الطيب دايما
صافى حليب
واد حتشوفه بجد
حتفرح
وتعوز جدا
ان تشيله تحطه ف قلبك
وتطير بيه
واد بصحيح اكبر من سنه
عمره ما عرفت رجله الحجله
ولا عدت مره البحر الواسع
واد بتحطه فى اى مكان
دايما تلاقيه
رافع راسك







(انتظار )



مين اللي قال لك .. تنتظر ع الشط
لا المركبة الجيه هناك
حتجيب لك خبر عنها
ولا الموجه اللي بتوشوش محار الشط
حتقول لك
بتستناك



(حجر ف اليدولا قعده ع الطـاولة)



تطوحني دراعاتك شمال ويمين
أروح في النوم وأنا صاحي
وتفضحني عيون الليل
وأنا المركون في دم الشمس صبّاحي
ومستنظر..
تقوم م النوم
تكسر خنقة القمقم
وتخرج بره قضبانه
وتتمشى
في شوارع حلمك العتمة
برصفانه
ونتقابل
تاخدنى فـ حضنك القاسي
وترفعني
وأنا الجاثم
أنا الراسم غيطان حلمك
وزيتونها
أنا الناصب مراجيحك
وجايب لك في راكبينها
أنا اللي بأعلىّ طيارتك
في عين الشمس .. باسكنها
وأنا اللى أنْ نمت 00بانيمها
أنا الرافع رايات بلدك
وأعلامها
أنا وأنت00
وترميني على راسه
أقوم م النوم
ألاقي الشاشة فوق قورته
بتغرق دم
وتضحك أنت لا مهتم برصاصه
حتشرب كل أنفاسك
تطوحنى على راسه
يصوب مدفعه الرشاش
على راسك
ويطلقها . ميحبسهاش
وساعة الطلقة ما تعدي
أنا يدي .. متمنعهاش
وكان بدي أطوحّها بعيد عنك
لكن صدري مبيسعهاش
تطول صدرك
وف عنيك ينطفي بدرك
تمد ف إيدك المقلاع
تسلّمني
لعيلّ جي من غزة .. عيونه وِساع
تسلّمني
ومش فاضل ما بين شمس الحياة وحلمي
سوى هزة
تقوله وداع
تودّعني
وأروح فـ النوم



(ومهما العمر بيك طول .. يا موت حتموت )



وبتجينا على سَهوه
بدون إنذار
تقولي مانا نبهتك بكام مرسال
أقولك فين ؟
تقولي شعرك الشايب
تقولي جسمك الدايب
تقولي ضهرك المقووس
أقولك . قولى فين منهم
بقي (الزاهد)؟
يا شفرة موس
.....
يا شفرة موس
بتفصل عني كام صاحب
دانا ملحقتش اتصاحب
على صاحبي
على صاحبي أنا ملحقتش اتصاحب
أنا ملحقتش اتصاحب
على (محمود)
لو أنت بجد بتقدّر
وبتنفذ أى شئ مطلوب
وبتريّح
فاستناني حاتريح
وخدني ليه
......
خدني ليه
أنا راح أكملّ الندوة معاه للصبح
وننزل ع البلد عندي
هناك في (جريس)•
حنشرب فنجانين الشاي
مع سيجاره
وحاعمل له .. مع سنارتي سنّاره
ونصطاد السمك م البحر
ونلعب كوره ف الشارع
ونعمل للعيال مراجيح
وتجرى تصيح
على هزتنا للتوته
ويحكي لهم في حدوته
لكن بعنادك المعهود
ما امهلتوش
...
يا اضعف من خيوط العنكبوت في الريح
وخير دليل علي ضعفك
قا لتهولك
عصا (موسى)
وحوت (يونس)
ونار (براهيم)
وأنا .. اليوم جاى باقولهولك
فاصلب طولك الأول
واسمعنى.. ومتفوتنيش
دامها العمر بيك طول
ومهما تعيش
ياموت .. حتموت



(على شط قرب البحر)



دلوقتي حيقرب م البحر
ويبعد عن الشط حبه
حيقعد مع الحجر اللي بيشاركه
كوباية الشاي
ونفسين السيجاره
حيبص ع البنات اللي راجعين
من جناين اللمون والبرتقان
ويضحك
واللي بدورهم ..حيبصوله
ويناغشوه واحده ورا التانية
ويناغشهم
ومش هيروح
غير لما الشمس تروح ويسمع صوت النوارس
صوت النوارس اللي بيخليه
يعوم مع السمك ف الميه
ويكلم الهدهد
ويزوغ مع العصافير
صوت النوارس اللي بيفكره بحاجات قدمت
حاجات دلوقتي بتتحس
وما بتتشفشي
حاجات بتخليه يتوحد اكتر مع الملكوت
على شط قرب البحر
قاعد وبيدردش مع الحجر صاحبه
حاجهز السناره
وحانقي طعم من تحت الزير
وحاصيد سمك بكره
قاعد ومش عارف أنه معادلوش فـ الدنيا
غير
آخر نفس في السيجارة اللي فـ ايده
وأخر شفطه من كوباية الشاي
وأخر ضحكة



(جرح غـويط)



بعد ما تخش الصلا
حيخش عليك بالحنجل والمنجل
حيشدك من طراطيف مشاعرك
بعد ما يمسكك من إيدك اللي بتوجعك
حتمشي وراه كأنك منّوم
لحد ما يركب تفكيرك
ويدلدل رجليه
وهنا..
حيسيبك مع بنت قابلتها ع الترعة
زمان
شدتك ليها
وهي بتملي الزلعه
لما غمزت لك بعنيها وضحكت
وبقيت تستناها كل يوم الصبحيه
حيسيبك
مع حلم قديم
بحصيره
وسرير
ودولاب
وقلة ميه
حيسيبك مع جرح غويط
جرحتهولك بنت
كنت بتحلم وياها بعشرة عمر
لكن هيه
مصنتشي العيش والملح
وسابتك في نص السكه وهربت
مع عيل هلفوت
خدها
ونزل بيها على مصر
هنا
هتفوق على دمعك نازل يشلب
وصوت الإمام وهوه
بيبص
يمين وشمال
ويسلم




(في الزفـــه)




ماشي
والزفة طالعة
شايل 30 سنة على ضهرك
وكام شعره بيضا ف راسك
ماعدتش بتبهجك الأعلام بالوانها
الأعلام اللي مكتوب في قلبها
(لا إله إلا الله)
وعلى حروفها
أبو بكر . عمر . عثمان . و على
الأعلام اللي كنت بتخطفها م العيال وتجري
وأنت فرحان بيها وهي بترفرف
ماعدتش بتخيل عليك النمر اللي بيعملها الحاوي
الحاوي اللي بينجح في لم الناس حواليه
لما بيعدي السيخ من خده
من غير ما نقطة دم تنزل
مبقتش تخاف من بودرة العفاريت
ولا بترهبك الخناقات اللي بتعملها العيال المراهقة
علشان البنات
البنات اللي شجرهم طرح فجأة
فسابوك وحيد
وحيد وتايه في الزحمة
ماشي بتدور على عيل .. ضايع منك
عيل
كان من كام يوم
بيلف معاك الزفه
وبيهرب م الكتاب وياك
ويبلبط ف الترعة
عيل كان اقرب ليك من نفسك
دلوقتي
ما بينه وبينك
أربع حيطان
مليانين بالضلمه
وشويه تراب



(في نفس المكان)



في نفس المكان ده
من عشرين سنه
قدام تربة جده
كان قاعد هُوّ وابوه
بيقروا على روح جِدّه الفاتحة
وبيسقوا الصّبار
الصّبار اللي أمّه بعتته
يجيب لها حتة منه
علشان تعوص الحلمه.... وتفطم اخوه
...............
الواد ده
كان خايف جداً يومها
يروح الترب لوحده
وبيخاف اكتر .. م العفاريت
...............
دلوقتي
قاعد مطمن جداً
قدام التربه
في نفس المكان اللي كان قاعد فيه من عشرين سنه
قاعد
وبيعلم ابنه إزّاي يقرا الفاتحة
على روح جده.
الديوان فاز بالمركز الثانى فى مسباقة مجلة الثقافه الجديده
وتحت الطبع (الهيئه العامه لقصور الثقافه)








يوم أمس, 12:34 PM







رد مع اقتباس
إضافة رد

الذين يشاهدون محتوى الموضوع الآن : 1 ( الأعضاء 0 والزوار 1)
 
الأعضاء الذين قرأو الموضوع :- 8
, , , , , ,
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
ندا روحى أحمد إبراهيم أحمد قناديل شعر العامية 3 07-22-2015 09:07 PM
ديوان روحى بيسكنها الحمام ل (منصوررجب) منصوررجب قناديل شعر العامية 6 01-18-2012 02:40 PM
أخر قوة ف روحى محمد الصاوي قناديل شعر العامية 19 12-10-2009 09:01 PM
فاضت روحي يوم ولدت روحي!! سأبقى الوحيد الذي يحتفل بعيد ميلاده وذكرى موته في يوم واحد ادونيس حسن قناديل الأعمال و الردود المتميزة و روائع المنقول 4 05-19-2009 12:26 AM
يطير الحمام يحطّ الحمام/محمود درويش رياض الشرايطي قناديل الأعمال و الردود المتميزة و روائع المنقول 1 11-24-2008 02:14 PM


Loading...


:: الإعلانات النصيه ::

روابط نصيه روابط نصيه روابط نصيه روابط نصيه روابط نصيه
روابط نصيه روابط نصيه روابط نصيه روابط نصيه روابط نصيه
روابط نصيه روابط نصيه روابط نصيه روابط نصيه روابط نصيه
روابط نصيه روابط نصيه روابط نصيه روابط نصيه روابط نصيه
روابط نصيه روابط نصيه روابط نصيه روابط نصيه روابط نصيه


Powered by vBulletin® Version 3.8.4
Copyright ©2000 - 2018, Jelsoft Enterprises Ltd.

Security by AOLO
vEhdaa4.0 by vAnDa ©2010